Китобхонаи электронӣ

Дар шароити кунунӣ, ки ҳама гуна иттилоъ мавқеъ ва қимати хосро дорост, мутахассисони соҳаҳои гуногун истифода аз техникаю технологияи электрониро ҷиҳати расидан ба ҳадаф хеле муҳим мешуморанд. Техникаи муосир имкон медиҳад, ки коркарди босифати иттилоъ бо суръати баланд анҷом ёфта, ба ин васила муштариён ба ахбори лозим дар кўтоҳмуддат даст ёбанд. Табиист, ки Китобхона чун маркази муҳими иттилоотрасонӣ аз ин раванд наметавонад дар канор бошад, пас он ҳадафу самтҳои фаъолияташро бо талаботи ҷомеъаи иттилоотӣ созгор менамояд. Гузариш аз шеваҳои анъанавии иттилоотрасонӣ ба усулҳои муосири автоматикунонии фаъолият барои Китобхона ногузир аст. Алалхусус баробари китобҳои чопӣ арзи вуҷуд кардани Китобхонаи электронӣ тағироти куллӣ дар самти хидматрасонӣ ба хонанда ворид намуд. Пешрафти босуръати технологияи муосир алоқаи мобилӣ, телекоммуникатсия, компютер ва ғайра баробари иқтисоду иҷтимоъ маҳаки рушди иттилоотрасонӣ низ гардиданд.


Китобхонаи электронӣ навъи низоми дастёбӣ ба захоири иттилоотист, ки ба беҳбуди хизматрасонӣ дар ин самт мусоидат менамояд, он дар канори Китобхонаи анъанавӣ ба раванди хониш ва хадамоти китобдорӣ таъсири мусбӣ мерасонад. Китобхонаи электронӣ новобаста аз вақту реҷаи корӣ хизматрасонии доимиро ба муштариён таъмин ва аз хазинаҳо ва Китобхонаҳои дигар иттилоот дастрас менамояд, сарфи назар аз макони истиқомат ва ҷои кори истифодабаранда мухторияти макони нигаҳдории нашрияҳоро таъмин месозад.

Имрӯз Китобхонаи миллии Тоҷикистон дорои шароит ва имконоти хуби техникию технологӣ мебошад. Он баробари иҷрои рисолати асосии худҳифзу нигаҳдории маводи интишоротӣ ва қонеъ гардондани талаботи хонандагон ба адабиёти зарурӣ чун маркази тавлиду коркард, ҳифозот ва тарғибу тавиқи манобеъи электронии иттилоотӣ ба муштариён хидмат менамояд. Феълан нашрҳои электронии Китобхона дар ҳоли афзоишанд ва роғибон аз онҳо бањра мебардоранд. Роҳбарияти ин махзани маърифат ба тарбияи мутахассисони соҳа ва технологияи муосири иттилоотӣ таваҷҷӯҳи хос зоҳир менамояд.